June 23-a Lalpiangliana, Tanhril thihna chungchanga inhnamhnawiha puh vanga suspend mek police palite lakah Mizoram Police-in ni li hnuah pawh 'sou motu' hmanga FIR an thehluh loh avangin, Human Rights and Law Network (HRLN) chuan nimin khan Aizawl Police Station-ah FIR an thehlut.
FIR an thehluh chungchanga HRLN thuchhuah chuan, Lalpiangliana laka police thil tih dan an dem thu tarlangin, "Mipui thinrim laka misualte pawh humhimtu zawk tur police-te sawisakna ni ngeia lang a thihpui ta hi pawi kan ti tak zet a ni," a ti.
Piangliana thih atanga ni li hnuah pawh police-te'n 'Sou Muto' hmanga FIR an thehlut lo chu mak an tih thu sawiin, HRLN chuan, "Police-te hian zu fun hnih/khat emaw, ruihhlo emaw, rûkrù emaw an manin, Court rorelna an hmachhawn theih nan FIR an thehlut thin a. Mihring thihna hial a thlen chungchanga FIR an thehlut lo hi anmahni mi leh sate hum tumnaah kan ngai," an ti a; Piangliana thihnaa inhnamhnawihte zawng chhuak a, an phû tâwka hrem an nih ngei theih nan FIR an thehlut ta niin an tarlang a ni.
HRLN chuan, Piangliana thihnaa inhnamhnawihte chu man a, hrem ngei turin police-te an ngen a; an chhui chhuak thei lo a nih chuan, CBI chhuitir turin Mizoram sorkar an ngen a ni.
A thih dan chhui chian mek Lalpiangliana Tanhril, Central Jail-a khungtu Judicial Magistrate, Liansangzuala chuan, June 19 tlai dar 2-a a Court-a Lalpiangliana hruai a nih laiin Piangliana chu rilru lam harsatna neii ang a tih thu Vanglaini a hrilh.
Liansangzuala chuan, Lalpiangliana hian a puzawn, MB Rai chu a thah ngei a nih thu a hrilh tih sawiin, "Engtin nge a thah tih ka zawhin min chhang mumal tawh lo a, 'Ka dawm hlum', 'Ka bawihsâwm a nia' titein min chhang a. Hriatthiam awlsam zawnga ka zawh pawhin min chhanna a mumal thei chuang lo," a ti. Piangliana chu rilru buai deuh ang a tih thu a sawi rualin, hei hi a Court-a hruai a nih lai chauha thil thleng a nih thu leh, páwn lamah chuan engmah a hriat loh thu a sawi.
Liansangzuala chuan, "Lalpiangliana hian police-in an sawisak loh thu Court-ah a sawi a, Central Jail-a thawn a nih dawn avanga a hriselna dinhmun zawh a nih pawhin, a hriselna a that thu a sawi a ni," a ti a, a hmaa hruai a nih laiin Lalpiangliana'n hliam lian tham hmuh mai tur a neih loh thu a sawi bawk. "A hmai velah pawh engmah hliam liantham a nei lo a, ama'n a hriselna dinhmun a that thu a sawi bawk si a, Central Jail lamah ka thawn ta a ni," a ti a; damdawi-ina hruai a nih lai vela hliam a neih ang kha Court-a a inlan lai khan nei sela chuan, a hmuh ngei a rin thu magistrate Liansangzuala chuan a sawi bawk.
Court leh jail inkarah kut an inthlak a ni thei em tih zawhna chhangin Liansangzuala chuan, "Court in Jail-a thawn tur a tih tawh hi chuan police-te mawhphurhna a sang tawh a, chuvangin Court ni hian a hma thei angin jail-ah an dah nghal ka ring," a ti.
Hetih lai hian, Lalpiangliana nau, Pakunga chuan, Court-a a u an hruai hma zanah a u chuan Vaivakawn PS atangin an hruai chhuak a, Zohnuaia PWD Site Office-ah sawisak a nih thu a hrilh niin Vanglaini a lo hrilh tawh a; an unau inbiakna hi mobile phone hmanga record pawh a awm nghe nghe. Hetih lai vek hian, police hotute chuan, Lalpiangliana hi Court-a an hruai ni, June 19 tlai dar 4:10-ah Central Jail-ah hruai thlen a nih thu an sawi a ni.
Thulakna: Vanglaini